Sherehe mbali mbali za asili na kiutamaduni

Ndani ya visiwa vya Unguja na Pemba kuna sherehe mbali mbali za kiutamaduni kama sherehe za mwaka kogwa, fensi, sauti za busara, tamasha la nchi za jahazi na nyenginezo.

Mkoba wa ukili

Mkoba wa ukili hutengenezwa kwa kutumia ukindu, uzi wa ukindu na shazia. Huu ni mkoba wa asili lakini pia unaonesha utamaduni wa watu wa zanzibar.

VIUNGO VYA ASILI

Ndani ya visiwa vya zanzibar kuna viungo vingi vya asili ambavyo hutumiwa kwa ajili ya kutia katika vyakula kama vile chai na pilau. Pia wakaazi wa visiwa vya zanzibar hutumia viungo hivyo kwa maswala ya urembo na dawa. Viungo hivyo ni kama tangawizi, mdalasini, uzile, hiliki, pilipili manga, manjano na vyenginevyo.

NGOMA ZA ASILI NA UTAMADUNI ZA ZANZIBAR

Visiwa vya zanzibar vimebahatika kuwa na ngoma mbali mbali za asili kama vile msewe, kibati, beni, njugu, mwanandege na nyenginezo nyingi. Ngoma hizo zinapochezwa, wachezaji huvaa mavazi ya asili kama vile seruni, kanga, chachacha za miguuni, ukindu, usinga na hata kuchukua fimbo. Na dhana kama vile ngoma, tarumbeta, cherewa na kadhalika. Tudumishe ngoma zetu za asili zanzibar.

RESI ZA NGARAWA

Resi za ngarawa ni moja kati ya burudani nzuri na za kuvutia za asili na kiutamaduni ambazo hufanyka ndani ya visiwa vya zanzibar.

PAKACHA

Wazanzibari tumebarikiwa sifa ya kutunza, kulinda na kuendeleza utamaduni wetu. Pakacha ni kitu ambacho hutengezwa kwa kutumia makuti na kazi yake ni kubebea vitu mbali mbali kama machungwa, embe, chenza, kuku na hata kitoweo, hivyo basi naweza kusema pakacha ni aina ya mkoba wa asili ambao umeanza kutumiwa tangu zamani na mababu na mabibi zetu na hadi hii leo bado tunaendeleza asili hiyo ya kutumia dhana hyo. Tudumishe asili na utamaduni wetu wa kizanzibari.

BAIBUI LA KAMBA NA NIKABU

Baibui la kamba ni vazi la zamani linaloonesha utamaduni wa watu wa zanzibar ambalo huvaliwa na wanawake wa zanzibar wanapokwenda safarini na hata harusini. pia kwa hapo zamani maharusi walikuwa wakivishwa vazi hili. Na nikabu ni kivazi kinachoziba uso na kubakisha macho tu, nayo pia inaonesha utamaduni wa wanawake wa kizanzibari. Kiujumla hayo ni mavazi yanayopendeza sana na yanayowasitiri vizuri wanawake. Tudumishe utamaduni.

Zanzibar Map

Unguja and Pemba Island